சனிக்கிழமைகளில் பள்ளிகள் செயல்படும்!

மிக்ஜாம் புயல் காரணமாக பள்ளிகளுக்கு தொடர் விடுமுறை அளிக்கப்பட்ட நிலையில், ஜனவரி மற்றும்  பிப்ரவரி மாதங்களில் தலா இரு சனிக்கிழமைகளில் பள்ளிகள் செயல்படும் என சென்னை மாவட்ட முதன்மைக்கல்வி அலுவலர் மார்ஸ் தெரிவித்துள்ளார். அவர் அனுப்பிய சுற்றறிக்கை பின் வருமாறு:-

மிக்ஜாம் புயல் மற்றும் வெள்ளம் காரணமாக சென்னை மாவட்டத்தின் அனைத்து வகை பள்ளிகளுக்கும் விடுமுறை அளிக்கப்பட்டிருந்தது. அந்த விடுமுறை நாள்களை  ஈடுசெய்யும் வகையில் ஜனவரியில் 6, 20-ம் தேதிகள், பிப்ரவரியில் 3, 17-ம் தேதிகள் ஆகிய சனிக்கிழமைகளில் பள்ளிகள் முழு நேரமாக செயல்படும். இதற்கான முன்னேற்பாடுகளை பள்ளி தலைமை ஆசிரியர்கள்  மேற்கொள்ள வேண்டும். இவ்வாறு அதில் தெரிவிக்கப்பட்டுள்ளது.