மாடியில் இருந்து சாலையில் வீசப்பட்ட நாய் குட்டி; வீடியோ வைரல்!
டெல்லியை அடுத்த நொய்டாவில் ஒரு சிறுவன் பிறந்து ஒரு மாதமான நாய்க்குட்டியை அடுக்குமாடி குடியிருப்பின் மேல்தளத்தில் இருந்து சாலையில் வீசி கொன்ற நெஞ்சை பதைபதைக்க வைக்கும் வீடியோ சமூக வலைத்தளங்களில் வைரலாகி பரவி வருகிறது. அந்த வீடியோவில் அடுக்குமாடி குடியிருப்பை ஒட்டியுள்ள புதரில் இருந்து நாய்க்குட்டியை சிறுவன் எடுத்து செல்லும் காட்சிகளும், பின்னர் அடுக்குமாடி குடியிருப்பின் மேல்தளத்தில் இருந்து நாய்க்குட்டியை சாலையில் வீசும் காட்சிகளும் உள்ளன. அந்த வீடியோவை பார்த்த விலங்குகள் நல ஆர்வலர் ஒருவர் இது குறித்து போலீசில் புகார் அளித்தார். அதன் பேரில் போலீசார் வழக்கு பதிவு செய்து விசாரணை நடத்தி வருகின்றனர்.
